Daeth Sioned Webb yn enillydd cenedlaethol ar y piano pan oedd hi’n wyth oed. Astudiodd gyda William Mathias ac Jana Frenklova ym Mangor cyn derbyn gwersi cyfeilio yn RAM Llundain. Fel hyfforddwr, mae ei disgyblion wedi dod i’r brig mewn cystadlaethau cenedlaethol a rhyngwladol ac mae newydd ddarfod ei halbwm ‘Sonant’ i ddau biano gyda’r cerddor Sian James fydd allan yn gynnar yn 2026. Mae ei cherddoriaeth wedi mynd a hi i garchardai ac ynysoedd pellennig yn ogystal â’r neuadd gyngerdd.

Yn wreiddiol o Sir y Fflint, mae Bethan yn mwynhau gyrfa llawrydd fel pianydd a thelynores. Ar hyn o bryd mae hi’n dysgu piano yn Ysgol Y Brenin, Caer yn ogystal ag yn ei stiwdio gartref ym Mynydd Isa. Ochr yn ochr â dysgu, mae hi’n mwynhau gyrfa berfformio brysur ac amrywiol. Mae hi wedi perfformio gyda llawer o gerddorfeydd ledled y wlad gan gynnwys NEW Sinfonia, Cerddorfa Ffilharmonig Lerpwl a Cherddorfa Symffoni Dinas Birmingham. Yn gerddor siambr brwd, mae Bethan yn aelod o’r grŵp Ffliwt a Thelyn, ‘Hefin Duo’ yn ogystal â ‘Trilogy’, triawd ffliwt, telyn a fiola. Mae Bethan hefyd wedi gweithio fel cyfeilydd i wahanol gorau gan gynnwys NEW Voices, Opera Ieuenctid WNO a Chantorion Rhos. Enillodd Bethan Radd Anrhydedd Dosbarth Cyntaf o Goleg Brenhinol Cerdd a Drama yn 2017 a dychwelodd i’r Coleg Brenhinol Cerdd a Drama ar gyfer astudiaethau ôl-raddedig gyda Ysgoloriaeth Teulu Ashley. Graddiodd Bethan gyda Meistr Perfformio gyda Rhagoriaeth yn 2019 ac ar ôl cwblhau ei hastudiaethau dyfarnwyd iddi y wobr fawreddog ‘Queen Elizabeth, The Queen Mother Rose Bowl’.

Wedi’i ddisgrifio gan y Daily Telegraph fel ‘pianydd o flas, hyder a sensitifrwydd chwaethus di-fai’, mae Iwan Llewelyn-Jones wedi sefydlu ei hun fel un o bianyddion gorau ei genhedlaeth. Mae wedi perfformio mewn llawer o neuaddau cyngerdd mawreddog y byd gan gynnwys Neuadd Wigmore, Neuadd y Frenhines Elizabeth, Gewandhaus Leipzig, a Thŷ Opera Sydney. Iwan yw Cyfarwyddwr Artistig Gŵyl Piano Ryngwladol Cymru 2025, ar ôl curadu’r ddwy Ŵyl flaenorol yn 2016 a 2021. Mae wedi derbyn sawl gwobr ac anrhydedd, gan gynnwys Gwobr Syr Geraint Evans i gydnabod ei gyfraniad sylweddol i gerddoriaeth Cymru. Mae Iwan yn Artist Steinway ac mae’n cyfuno amserlen berfformio ryngwladol brysur â’i rôl fel Uwch Ddarlithydd a Chyfarwyddwr Perfformio Cerddoriaeth ym Mhrifysgol Bangor.